Sarwat Zehra
jab aah bhi chup ho to ye sahrai kare kya
sar phode na khud se to ye tanhai kare kya
guzri jo idhar se to ghutan se ye maregi
habs-e-dil-e-vahshi men ye purvai kare kya
kahti hai jo kahne do ye duniya mujhe kya hai
zindani-e-ehsas men rusvai kare kya
har husn o ada dhans gae aine ke andar
jab raakh hon ankhen to ye zebai kare kya
vo zakhm ki har lams naya zakhm lage hai
bimari-e-idrak masihai kare kya
pal bhar ko ye sauda-e-junun kam nahin hota
shahron ke takalluf men ye saudai kare kya
Leave a Reply