Poet
jan-fishani ka vaan hisab abas
jo kaho us ka hai javab abas
mahtab aur katan ka aalam hai
ariz-e-dost par naqab abas
qufl-e-dar ki kalid na-paida
ab tamanna-e-fath-e-bab abas
zulf-e-pur-kham hava se kyuun na hile
aap khate hain pech-o-tab abas
khat use bhejna zarur magar
dost se khvahish-e-javab abas
mere ashar sab bayazi hain
ham-nashin fikr-e-intekhab abas
hai hamari nazar men hurmat-e-mai
pechish-e-ahl-e-ehtisab abas
yaan nahin kufr-o-din khauf-o-raja
lutf be-faeda itaab abas
na savab us men hai na is men asar
sabr ba-huda iztirab abas
vaada us ne kiya to kya ‘nazim’
abas ai khanuman-kharab abas
Leave a Reply