Akbar Allahabadi
huun main parvana magar shama to ho raat to ho
jaan dene ko huun maujud koi baat to ho
dil bhi hazir sar-e-taslim bhi kham ko maujud
koi markaz ho koi qibla-e-hajat to ho
dil to bechain hai izhar-e-iradat ke liye
kisi janib se kuchh izhar-e-karamat to ho
dil-kusha bada-e-safi ka kise zauq nahin
batin-afroz koi pir-e-kharabat to ho
guftani hai dil-e-pur-dard ka qissa lekin
kis se kahiye koi mustafsir-e-halat to ho
dastan-e-gham-e-dil kaun kahe kaun sune
bazm men mauqa-e-izhar-e-khayalat to ho
vaade bhi yaad dilate hain gile bhi hain bahut
vo dikhai bhi to den un se mulaqat to ho
koi vaaiz nahin fitrat se balaghat men siva
magar insan men kuchh fahm-e-isharat to ho
Leave a Reply