Aziz Bano Darab Wafa
ham koi nadan nahin ki bachchon ki si baat karen
jiina koi khel nahin hai baitho tuk ki baat karen
shiv to nahin ham phir bhi ham ne duniya bhar ke zahr piye
itni kadvahat hai munh men kaise mithi baat karen
ham ne sab ko muflis pa ke tod diya dil ka kashkol
ham ko koi kya de dega kyuun munh-dekhi baat karen
ham ne kab ye gur sikha ham thahre sidhe-sade log
jis ki jaisi fitrat dekhen us se vaisi baat karen
Leave a Reply