Poet
ho gae angan juda aur raste bhi bat gae
kya hua ye log kyuun ik dusre se kat gae
gham ne har ik raste men khol rakkha tha mahaz
ham bhi chehre par hansi ka khol le kar dat gae
nafraton ki dhuup jhulsane lagi har shakhs ko
pyaar ke us shahr men sab ped kaise kat gae
dar ki jab saari haqiqat munkashif ham par hui
khud-bakhud dar ke sabhi saae achanak hat gae
kaun jaane kis nasheman par giri hain bijliyan
kis taraf tuute hue taron ke ye jhurmat gae
mo’atabar hone lagin jab bazm men tarikiyan
khamushi ki ot men ham log pichhe hat gae
ghar se ai ‘anjum’ zara bahar nikal kar dekhna
log kahte hain ki ab tarik badal chhat gae
Leave a Reply