Sheikh Ibrahim Zauq
haath siine pe mire rakh ke kidhar dekhte ho
ik nazar dil se idhar dekh lo gar dekhte ho
hai dam-e-baz-pasin dekh lo gar dekhte ho
aina munh pe mire rakh ke kidhar dekhte ho
na-tavani ka miri mujh se na puchho ahval
ho mujhe dekhte ya apni kamar dekhte ho
par-e-parvana pade hain shajar-e-shama ke gird
barg-rezi-e-mohabbat ka samar dekhte ho
bed-e-majnun ko ho jab dekhte ai ahl-e-nazar
kisi majnun ko bhi ashufta-basar dekhte ho
shauq-e-didar miri naash pe aa kar bola
kis ki ho dekhte raah aur kidhar dekhte ho
lazzat-e-navak-e-gham ‘zauq’ se ho puchhte kya
lab pade chatte hain zakhm-e-jigar dekhte ho
Leave a Reply