Najm Aafandi
hasti koi aisi bhi hai insan ke siva aur
mazhab ka khuda aur hai matlab ka khuda aur
phir thahar gaya qafila-e-dard suna hai
shayad koi raste men miri tarah gira aur
ik jurra-e-akhir ki kami rah gai akhir
jitni vo pilate gae ankhon ne kaha aur
mimbar se bahut fasl hai maidan-e-amal ka
taqrir ke mard aur hain mardan-e-vigha aur
allah gila kar ke main pachtaya huun kya kya
jab khatm hui baat kahin us ne kaha aur
kya zer-e-lab dost hai izhar-e-jasarat
haq ho ki vo nahaq ho zara lai to badha aur
daulat ka to pahle hi gunahgar tha munim
daulat ki mohabbat ne gunahgar kiya aur
ye vahm sa hota hai mujhe dekh ke un ko
sirat ka khuda aur hai surat ka khuda aur
Leave a Reply