Munawwar Rana
haan ijazat hai agar koi kahani aur hai
in katoron men abhi thoda sa paani aur hai
mazhabi mazdur sab baithe hain in ko kaam do
ek imarat shahr men kaafi purani aur hai
khamushi kab chikh ban jaae kise malum hai
zulm kar lo jab talak ye be-zabani aur hai
khushk patte aankh men chubhte hain kanton ki tarah
dasht men phirna alag hai baghbani aur hai
phir vahi uktahaten hongi badan chaupal men
umr ke qisse men thodi si javani aur hai
bas isi ehsas ki shiddat ne budha kar diya
tute-phute ghar men ik ladki siyani aur hai
Leave a Reply