Hamein Wo Kyun Yaad Aa Rahe Hain

Tanveer Anjum

duniya kis ki ungliyon par gardish kar rahi hai

ham nahin jante

ham bas ye jante hain

hamara vaqt tumhari ungliyon ki jumbish ka paband hai

ham ne jab giroh banae

surkh

niila

piila

sabz

naranji

kasni

safed

hamen tum ne in men se kisi giroh men nahin rakha

dar-asl tum ne hamen jaana hi nahin

ham tumhari zamin se bahar the

ek gahri siyahi men

apni siyahi men

ham is koshish men rahe

ki tumhari ghumti hui zamin ki kashish men dakhil ho jaaen

jab ham aisa karne men kamyab ho gae

tab hamen pata chala

ki ye sab tumhari ungliyon ki jumbish ka kamal hai

aur aaj jab ham

na chahte hue bhi

tumhare safed markaz ki samt badhe chale ja rahe hain

to hamen apni siyahi

aur is men rah jaane vaale log

buri tarah yaad kyuun aa rahe hain!