Hamein To Mai-Kade Ka Ye Nizam Achchha Nahin Lagta

Aal E Ahmad Suroor

hamen to mai-kade ka ye nizam achchha nahin lagta

na ho sab ke liye gardish men jaam achchha nahin lagta

kabhi tanhai ki khvahish ye hoti hai ki logon ka

payam achchha nahin lagta salam achchha nahin lagta

khuda se lau lagaen ya khudai se rahe rishta

faqat apni khudi ka ehtiram achchha nahin lagta

jabin-e-pur-shikan khasan-e-alam ki nahin bhati

magar ye bhi hai ghaugha-e-avam achchha nahin lagta

na khushbu pairahan ki hai na zulfon ki na baton ki

hamen ye jalva-e-bala-e-bam achchha nahin lagta

mayassar ho to qadre lutf bhi nemat hai yaan yaaro

kisi ka vada-e-aish-e-davam achchha nahin lagta

ye sasti lazzaton sasti siyasat ke pujari hain

hamen ahbab ka sauda-e-kham achchha nahin lagta

jahan harkat nahin hoti vahan barkat nahin hoti

‘surur’ ab vadi-e-gul men qayam achchha nahin lagta