Rakhshan Hashmi
hai vahi manzar-e-khun-rang jahan tak dekhun
main faqat ek hi tasvir kahan tak dekhun
niind tuuti hai mire khvab kahan tuute hain
aks tera hi haqiqat se guman tak dekhun
itni vusat de miri qalb-o-nazar ko maula
aankh sahra pe dharun ab-e-ravan tak dekhun
rut koi aae kabhi phuul khilane vaali
kab talak aag har ik sahn-o-makan tak dekhun
aaina hote hue apna uruuj aur zaval
matlaa-e-subh se maghrib ki azaan tak dekhun
baad allah ke vo hai miri shah-e-rag ke qarib
kab mire dil ki sada jaati hai maan tak dekhun
dil ki dahliz se hi laut gaya vo ‘rakhshan’
chahti thi main jise jism se jaan tak dekhun
Leave a Reply