Ahmad Faraz
gila fuzul tha ahd-e-vafa ke hote hue
so chup raha sitam-e-na-rava ke hote hue
ye qurbaton men ajab fasle pade ki mujhe
hai ashna ki talab ashna ke hote hue
vo hila-gar hain jo majburiyan shumar karen
charagh ham ne jalae hava ke hote hue
na chahne pe bhi tujh ko khuda se maang liya
ye haal hai dil-e-be-muddaa ke hote hue
na kar kisi pe bharosa ki kashtiyan duben
khuda ke hote hue nakhuda ke hote hue
magar ye ahl-e-riya kis qadar barahna hain
galim o dalq o aba o qaba ke hote hue
kise khabar hai ki kasa-ba-dast phirte hain
bahut se log saron par huma ke hote hue
‘faraz’ aise bhi lamhe kabhi kabhi aae
ki dil-girafta rahe dilruba ke hote hue
Leave a Reply