Riyaz Khairabadi
ghair se bad-guman ho jaate
meri sunte to kaan ho jaate
mehrban asman ho jaate
aap agar mehrban ho jaate
mere ghar mehman ho jaate
dil men tum aa ke jaan ho jaate
jaate ham zaar us gali men agar
zarre bhi asman ho jaate
pir-e-fani ko vaqt-e-bada-kashi
ham ne dekha javan ho jaate
naam mera jo bazm men aata
mere lakhon bayan ho jaate
dil to kahta hai lutf-e-vasl ye tha
jan-e-man meri jaan ho jaate
kahte teri si barg-e-gul bulbul
ye bhi teri zaban ho jaate
bose kya le koi tasavvur men
ki hain rukh par nishan ho jaate
zulm dhate jo aate turbat par
farsh-e-rah asman ho jaate
badalon men jo mai bhari hoti
jhuk ke unchi dukan ho jaate
shaikh ji mai-kada vo jannat hai
tum bhi ja kar javan ho jaate
pasban to raqib ban jaata
ham tire pasban ho jaate
milte kam-umr mah-jabin jo ‘riyaz’
ham abhi naujavan ho jaate
Leave a Reply