Bahadur Shah Zafar
gai yak-ba-yak jo hava palat nahin dil ko mere qarar hai
karun us sitam ko main kya bayan mira gham se siina figar hai
ye reaya-e-hind tabah hui kahun kya jo in pe jafa hui
jise dekha hakim-e-vaqt ne kaha ye bhi qabil-e-dar hai
ye kisi ne zulm bhi hai suna ki di phansi logon ko be-gunah
vahi kalma-goyon ki samt se abhi dil men un ke bukhar hai
na tha shahr-e-dehli ye tha chaman kaho kis tarah ka tha yaan aman
jo khitab tha vo mita diya faqat ab to ujda dayar hai
yahi tang haal jo sab ka hai ye karishma qudrat-e-rab ka hai
jo bahar thi so khizan hui jo khizan thi ab vo bahar hai
shab-o-roz phuul men jo tule kaho khar-e-gham ko vo kya sahe
mile tauq qaid men jab unhen kaha gul ke badle ye haar hai
sabhi jaada matam-e-sakht hai kaho kaisi gardish-e-bakht hai
na vo taaj hai na vo takht hai na vo shaah hai na dayar hai
jo suluk karte the aur se vahi ab hain kitne zalil se
vo hain tang charkh ke jaur se raha tan pe un ke na taar hai
na vabal tan pe hai sar mira nahin jaan jaane ka dar zara
kate gham hii, nikle jo dam mira mujhe apni zindagi baar hai
kya hai gham ‘zafar’ tujhe hashr ka jo khuda ne chaha to barmala
hamen hai vasila rasul ka vo hamara hami-e-kar hai
Leave a Reply