Muneer Niyazi
ek main aur itne lakhon silsilon ke samne
ek saut-e-gung jaise gumbadon ke samne
mitte jaate naqsh dud-e-dam ki aamad raft se
khulte jaate be-sada lab ainon ke samne
hai hava-e-sair-e-ab aur ajnabi si sar-zamin
ud rahi hai khak-e-kohna sahilon ke samne
aag jalti hai gharon men ya koi tasvir hai
yadgar-e-jurm-e-adam khakiyon ke samne
dushmani rasm-e-jahan hai dosti harf-e-ghalat
aadmi tanha khada hai zalimon ke samne
chaar chup chizen hain bahr-o-bar falak aur kohsar
dil dahal jaata hai in khali jaghon ke samne
batin-e-zardar pur-asrar hai jaise ‘munir’
kan-e-zar ki band haibat mashalon ke samne
Leave a Reply