Poet
raam ke hijr men ik rose bharat ne ye kaha
qalb-e-muztar ko shab-o-roz nahin chain zara
dil men arman hai ki aa jaaen vatan men raghubir
yaad men un ki kaleje men chubhe hain nashtar
koi bhaai se kahe zakhm-e-jigar bhar den mira
khana-e-dil ko ziyarat se munavvar kar den
raam aaen to diye ghi ke jalaun ghar ghar
dip-mala ka saman aaj dikhaun ghar ghar
tegh-e-furqat se jigar paash hua jaata hai
dil gham-e-ranj se pamal hua jaata hai
daagh hain mere jale dil pe hazaron lakhon
gham ke nashtar jo chale dil pe hazaron lakhon
kah rahe the ye bharat jabki siri-ram aae
dhuum duniya men machi nuur ke badal chhae
arsh tak farsh se jai jai ki sada jaati thi
khurrami ashk har ik aankh se barsati thi
jalva-e-rukh se hua raam ke aalam raushan
pur umidon ke gulon se hua sab ka daman
mohni shakl jo raghubir ki nazar aati thi
aankh tazim se khilqat ki jhuki jaati thi
muddaton baad bharat ne ye nazara dekha
kamyabi ke falak par tha sitara chamka
dil khushi se kabhi pahlu men uchhal padta tha
ho mubarak ye kabhi munh se nikal padta tha
hote raushan hain charagh aaj jahan men yaksan
gul hua aaj hi par ek charagh-e-taban
hai murad us se vo bharat ka charagh-e-raushan
naam hai jis ka dayanand jo tha fakhr-e-vatan
jis dayanand ne bharat ki palat di qismat
jis dayanand ne duniya ki badal di halat
jis dayanand ne gulzar banae jangal
jis dayanand ne qaumon men macha di halchal
aaj vo hind ka afsos dulara na raha
gham-nasibon ke liye koi sahara na raha
yaad hai us ki zamane men har ik su jaari
us ki furqat ki lagi tegh jigar par kaari
dil ye kahta hai ki is vaqt zabanen kholen
aao mil mil ke dayanand ki ham jai bolen
Leave a Reply