Dagh Dehlvi
dil mubtala-e-lazzat-e-azar hi raha
marna firaq-e-yar men dushvar hi raha
har dam ye shauq tha use qurban kijiye
main vasl men bhi jaan se be-zar hi raha
ehsan-e-afv-e-jurm se vo sharmsar huun
bakhsha gaya main to bhi gunahgar hi raha
hoti hain har tarah se miri pasdariyan
dushman ke paas bhi vo mira yaar hi raha
din pahluon se taal diya kuchh na kah sake
har chand un ko vasl ka inkar hi raha
zahid ki tauba tauba rahi ghunt ghunt par
sau botalen uda ke bhi hushyar hi raha
dekhin hazar rashk-e-masiha ki suraten
achchha raha jo ishq ka bimar hi raha
sadqe men tum ne chhod diye hain bahut asiir
main bhi riha hua ki giraftar hi raha
lazzat vafa men hai na kisi ki jafa men hai
dildar hi raha na dil-azar hi raha
jalve ke baad vasl ki khvahish zarur thi
vo kya raha jo ashiq-e-didar hi raha
kahte hain jal ke ghair mohabbat se ‘dagh’ ki
mashuq us ke paas vafadar hi raha
Leave a Reply