dil Jal Ke Rah Gae Zaqan-E-Rashk-E-Mah Par

Taashshuq Lakhnavi

dil jal ke rah gae zaqan-e-rashk-e-mah par

is qafila ko pyaas ne maara hai chaah par

gesu ko naaz hai dil-e-raushan ki chaah par

parvana ye charagh hai mar-e-siyah par

niind ud gai giran hai ye shab rashk-e-mah par

bijli na kyuun falak se gire meri aah par

hai yaad khuftgan-e-zamin ka jo khatt-e-sabz

bhule se main qadam nahin rakhta giyah par

lutta hai khana-e-dil-e-ashiq bachaiye

bigdi hui hai fauj-e-mizha kis gunah par

tasir ka hai khauf unhen ain shauq men

hai dil pe haath kaan hain avaz-e-ah par

mahshar bapa hai band hain kushton ke raste

qad baadh par hai baadh hai tegh-e-nigah par

kya aadmi ki khaak ko raundun main rahm-dil

rota hai paemali-e-mardum-giyah par

kahte ho kis ke qalb men uthta hai shab ko dard

rota hai dil mira mire hal-e-tabah par

akhir talash-e-gor hui dil ko ishq men

barson tabah ho ke ab aaya hai raah par

dil ke muamle men na ho dakhl ghair ko

lena jo ho to lijiye apni nigah par

uupar ki saans lene ka azar ho gaya

jis ki nazar padi tiri tirchhi nigah par

bakhiya jarahat-e-dil-e-nazuk-mizaj ka

mauquf hai huzur ke tar-e-nigah par