dil Hai Ghiza-E-Ranj Jigar Hai Ghiza-E-Ranj

Poet

dil hai ghiza-e-ranj jigar hai ghiza-e-ranj

paida kiya hai ham ko khuda ne bara-e-ranj

hasil kisi se kuchh nahin hota siva-e-ranj

duniya men laai hai hamen qismat bara-e-ranj

aadam se bagh-e-khuld chhuta ham se ku-e-yar

vo ibtida-e-ranj hai ye intiha-e-ranj

mumkin nahin hai aae jo bu-e-gul-e-nashat

aise dimagh-e-jan men bhari hai hava-e-ranj

jhidki de galiyan de sitamgar zalil kar

kafir ho ai sanam jo zara dil men laae ranj

ham nakhl-e-ah se chaman-e-rozgar men

bandha kiye hava paye nashv-o-numa-e-ranj

ai san-e-azal miri mitti kharab ki

kya chahiye thi khana-e-dil men bina-e-ranj

sab dost apni haal men hain aap mubtala

kis se kahun main kaun sune majra-e-ranj

ham bar-e-ishq ke mutahammil na ho sake

bas dil pakad ke baith gae vo uthae ranj

hain sikka-ha-e-dagh hazaron bhare hue

qasr-e-dil-e-faqir hai daulat sara-e-ranj

bhuli nahin nasib ke likkhe ki khubiyan

tahrir lauh-e-dil pe hai sab majra-e-ranj

mumkin nahin mizaj rahe ek haal par

gah ashna-e-aish hain gah ashna-e-ranj

achchhe ye qahqahe nahin ashiq ke haal par

dekho hansi hansi men kahin ho na jaae ranj

hote hain kis libas men ashar-e-dardnak

bahr-e-urus fikr hai zeba rida-e-ranj

kya gham jo ku-e-yar men hota huun paemal

fart-e-khushi se khaak nahin dil men jaae ranj

kahte hain mere dost mira haal dekh kar

dushman ko bhi khuda na kare mubtala-e-ranj

sauda-e-ishq men ye saadat husul hai

bakht-e-siyah hai saya-e-bal-e-huma-e-ranj

andher sadma-e-shab-e-furqat hai ai ‘saba’

andhi charagh-e-jan ke liye hai hava-e-ranj