Poet
dil-e-pur daagh baagh kis ka hai
dida-e-tar ayagh kis ka hai
mai-kada sehn-e-bagh kis ka hai
saghar-e-gul ayagh kis ka hai
daagh chamka chali nasim-e-bahar
ye hava men charagh kis ka hai
kyuun kahen zulf-e-yar ko sumbul
yaan pareshan dimagh kis ka hai
dil-e-pur-dagh ki yahi hai bahar
na khule khana baagh kis ka hai
naseha maghz kyuun phirata hai
chal tira sa dimagh kis ka hai
chaar unsur ke sab tamashe hain
vaah ye char-bagh kis ka hai
arsh-e-ali pe fikr-e-ali hai
ham ne paaya suragh kis ka hai
kis ka maskan hai sina-e-arif
dil-e-raushan charagh kis ka hai
jeb-e-gul kis pe chaak rahta hai
dil men laale ke daagh kis ka hai
din-o-duniya ko tark kar baithe
aur naam infiragh kis ka hai
ai junun tere vaste sab hain
baagh kis ka hai raagh kis ka hai
yaar allah re tera aalam
dekh ye dil men daagh kis ka hai
mah-ru aur bhi hain duniya men
yuun falak par dimagh kis ka hai
ai ‘saba’ is zamin men aise sher
aisa aali dimagh kis ka hai
Leave a Reply