Poet
dekhen tujhe na avenge ham
kahna nahin kar dikhavenge ham
ye jaur koi uthave kab tak
uth dar hi se tere javenge ham
ghar se mujhe mat nikal sun rakh
javenge to phir na avenge ham
tu qat-e-nazar to ham se kar dekh
nazron se tujhe giravenge ham
do din kabhu tire ghar na aaven
ghar apne tujhe bulavenge ham
ghar us ka to dhund kar ke paaya
ya-rab use ghar bhi pavenge ham
aghmaz kare hai sab samajh kar
kya haal use sunavenge ham
bose to diye hain tiin tu hans hans
gaali tiri kyuun na khavenge ham
itni bhi paka na meri chhati
ai ghair tujhe rijhavenge ham
dil vo tujhe puchhe ya na puchhe
par yaad tiri dilavenge ham
taab us ki jafaon ki kisi tarah
‘hasrat’ ab to na lavenge ham
Leave a Reply