Shaista Mufti
mohabbat daimi sukh hai
ki jis ko maut ki ghadiyan
kabhi kam kar nahin saktin
ye mausam ik dafa aae
to phir aa kar thahar jaae
hasin shadab si kaliyan
nigahon men sama jaaen
to phir ye mar nahin saktin
khayalon ki ravani men
ki jaise bahte paani men
kanval khil jaaen khvabon ke
to qudarat muskurati hai
ishara kar ke taron se
chhalakte absharon se
madhur sargoshiyan kar ke
hamen rasta dikhati hai
ye rasta kis qadar hairan-kun manzil dikhata hai
isi raste pe insan khud ko pahli baar paata hai
mohabbat ko saza kahne se pahle soch kar rakhna
ki jo is se bichhad jaae use manzil nahin milti
bikhar jaaen jo ban kar khaak phir mahfil nahin milti
mohabbat daimi sukh hai
ye sukh main chahti huun teri ankhon men nazar aae
ki tu is kaenat-e-khvab ka hamraz ban jaae
mohabbat daimi sukh hai
Leave a Reply