Shabnam Shakeel
chalti rahti hai tasalsul se junun-khez hava
jalta rahta hai magar phir bhi kahin ek diya
kisi mahfil men koi shakhs bahut khul ke hansa
vaqia ye to ajab aaj yahan pesh aaya
yaad aata hai bahut ek purana angan
jis men pipal ka ghana ped hua karta tha
ashk bahte hain to bahte hi chale jaate hain
rok sakta hai bahav bhi koi dariya ka
raat ham ek ghazal likhte hue rote rahe
baaz lafzon ko to ashkon ne mita hi daala
phir se takra gaya mujh hi se mire dil ka mafad
phir se barpa hua ik marka-e-karb-o-bala
Leave a Reply