Poet
chahe so hamen kar tu gunahgar hain tere
taqdir thi apni ki giraftar hain tere
marte hain kabhi aa ke hamari bhi khabar le
aah ai but-e-bedard ye bimar hain tere
naqd-e-dil-o-din muft men de baithenge akhir
ham ashiq-e-muflis ki kharidar hain tere
khvahish hai na bose ki na aghosh se matlab
didar ke yaan sirf talabgar hain tere
hai ru-e-zamin arsa-e-mahshar unhen har roz
jo dil-shuda-e-qamat-o-raftar hain tere
ham vasl men aur hijr men jalte rahe un se
kya dagh-e-jigar ye gul-e-rukhsar hain tere
saugand hai ‘hasrat’ mujhe ejaz-e-sukhan ki
ye sehr hain jaadu hain na ashar hain tere
Leave a Reply