Ahmad Nadeem Qasmi
barish ki rut thi raat thi pahlu-e-yar tha
ye bhi tilism-e-gardish-e-lail-o-nahar tha
kahte hain log auj pe tha mausam-e-bahar
dil kah raha hai arbada-e-zulf-e-yar tha
ab to visal-e-yar se behtar hai yad-e-yar
main bhi kabhi fareb-e-nazar ka shikar tha
tu meri zindagi se bhi katra ke chal diya
tujh ko to meri maut pe bhi ikhtiyar tha
o gaane vaale tutte taron ke saaz par
main bhi shahid-e-tul-e-shab-e-intizar tha
palken uthin jhapak ke girin phir na uth sakin
ye e’tibar hai to kahan e’tibar tha
yazdan se bhi ulajh hi pada tha tira ‘nadim’
yaani azal se dil men yahi khalfashar tha
Leave a Reply