Poet
banda ab na-subur hota hai
afv hove qusur hota hai
vo zamin par qadam nahin rakhte
husn ka kya ghurur hota hai
daulat husn ke lutane men
kharch kya ai huzur hota hai
surma ankhon men vo lagate hain
dekhiye kya futur hota hai
ham hain majbur aap hain mukhtar
kahiye kis se qusur hota hai
saaya us aftab-talat ka
dida-e-mah ka nuur hota hai
khaak hasil hai us se murdon ko
zar jo sarf-e-qubur hota hai
mai-kashon men mudam ai zahid
nara-e-ya-ghafur hota hai
vasl ho taliye na bose par
is se kya ai huzur hota hai
fikr rakhte nahin hain divane
bais-e-gham shuur hota hai
partav-e-rukh se un ka jeb-e-qaba
daman-e-koh-e-tur hota hai
khuub ashiq ka paas karte ho
har ghadi duur duur hota hai
ek hi nuur ka zamane men
sau tarah se zuhur hota hai
mujh ko nahaq halal karte hai
khuun ye be-qusur hota hai
kashti-e-mai chali to ai saaqi
bahr-e-gham se ubuur hota hai
ai ‘saba’ jab bahar aati hai
ham ko sauda zarur hota hai
Leave a Reply