Bahaar

Nazeer Akbarabadi

gulshan-e-alam men jab tashrif laati hai bahar

rang-o-bu ke husn kya kya kuchh dikhati hai bahar

subh ko la kar nasim dil-kusha har shakh par

taza-tar kis kis tarah ke gul khilati hai bahar

naunihalon ki dikha kar dam-ba-dam nashv-o-numa

jism men ruh-e-ravan kya kya badhati hai bahar

bulbulen chahkarti hain shakh-e-gul par ja-ba-ja

bulbulen kya fil-haqiqat chahchahati hai bahar

hauz-o-favvaron ko de kar aabru phir lutf se

kya moattar farsh sabze ka bichhati hai bahar

jumbish-e-bad-e-saba se ho ke ham-dosh-e-nashat

saath har sabze ke kya kya lahlahati hai bahar

khalq ko har lahza apne husn ki rangat dikha

be-takalluf kya hi har dil men samati hai bahar

majmaa-e-khuban hujum-e-ashiqan aur josh-e-gul

dekh in rangon ko kya kya khilkhilati hai bahar

gul-rukhon ki dekh kar gul-baziyan har dam nazir

gul idhar khandan udhar dhumen machati hai bahar