Taashshuq Lakhnavi
baagh men phulon ko raund aai savari aap ki
kis qadar mamnun hai bad-e-bahari aap ki
bevafai aap ki ghaflat-shiari aap ki
mere dil ne adaten sikhi hain saari aap ki
hai yaqin baham gale milne ko utthen dast-e-shauq
ho agar tasvir bhi yakja hamari aap ki
mai-kade men tuute jaate hain baham lad lad ke jaam
mufsida-pardaz hai chashm-e-khumari aap ki
jazb ise kahte hain aae kahne meri qabr tak
ab yahan se badh nahin sakti savari aap ki
karti hain andher hathon ki ye kaali mailiyan
qatil-e-alam hui hai sogvari aap ki
ja-ba-ja hote hain daman-gir dil ushshaq ke
har qadam par aaj rukti hai savari aap ki
yad-e-ayyame ki tha zoron pe jazb-e-husn-o-ishq
vo mire dil ka tadapna be-qarari aap ki
hai shab-e-mahtab gore rang se kapde siyah
husn ko chamka rahi hai sogvari aap ki
do tarah ke ek saghar men labalab hai sharab
khvab-aluda nahin chashm-e-khumari aap ki
mere lashe ko liye phirte hain un rahon men log
jin gali-kuchon men phirti thi savari aap ki
aaj kis par rahm aaya kis ko roe hain huzur
hai nasib-e-dushmanan avaz bhari aap ki
ahd men majnun ke laila ka raha kya daur daur
ab ‘taashshuq’ ke zamane men hai baari aap ki
Leave a Reply