Mushafi Ghulam Hamdani
baat ko meri alag ho ke na sharmao suno
kuchh kaha chahun huun main tum se idhar aao suno
main to jaane ka nahin ru-ba-ru us ke yaaro
kuchh vo gar tum se kahe hai to tumhin jaao suno
chhedne ko mire gar aap ka ji chahe hai
be-adab huun main mire haq men jo farmao suno
baat bhi maano kisi ki koi ye bhi zid hai
apne ashiq ke taiin itna na tarsao suno
gul-sanobar ka agar qissa hai tum paas miyan
padhne vaala bhi to maujud huun main laao suno
ai dil o diida maaal is ka bura hi samjho
dekh kar us ke taiin itna na lalchao suno
‘mushafi’ baat to kahne do zara qasid ko
pahle hi harf men tum itna na ghabrao suno
Leave a Reply