Bushra Farrukh
ba-zahir tujh se milne ka koi imkan nahin hai
dilason se bahalta ye dil-e-nadan nahin hai
chaman men laakh bhi barse agar abr-e-baharan
to nakhl-e-dil hara hone ka kuchh imkan nahin hai
hava-e-vaqt ne jis basti-e-dil ko ujada hai
use abad karna kaam kuchh asan nahin hai
vo ik divar hai haail hamare darmiyan jo
kisi rauzan ka us men ab koi imkan nahin hai
agarche kha gai dimak ghamon ki bam-o-dar ko
magar tuuti abhi tak ye fasil-e-jan nahin hai
tumhari ruuh ‘bushra’ qaid hai tan ke qafas men
ise azad karna moajaza asan nahin hai
Leave a Reply