Poet
azizo tum na kuchh us ko kaho hua so hua
nipat hi tund hai zalim ki khu hua so hua
khata se us ki nahin naam ko ghubar-e-malal
main ro ro daala hai sab dil se dho hua so hua
miri khata ya jafa thi tiri ye kya hai zikr
hua jo chahiye phir to na ho hua so hua
hanse hai dil men ye na-dardmand sab sun sun
to dukh ko ishq ke ai dil na ro hua so hua
sitamgaro jo tumhen rahm ki ho kuchh taufiq
sitam ki apne talafi karo hua so hua
tu kaun hai ki ho milne se ghair kai maane
dil us ko haath se apne na kho hua so hua
na sarguzisht miri puchh mujh se kuchh ai bakht
tu apne khvab-e-faraghat men so hua so hua
mohabbat ek tarah ki niri samajat hai
main chhodun huun tiri ab justuju hua so hua
bayan-e-hal se rukta hai ‘hasrat’ ab yaaro
na puchho us se na kuchh tum kaho hua so hua
Leave a Reply