Asiran-e-Qafas Aisa To Ho Tarz-e-Fughan Apna

Poet

asiran-e-qafas aisa to ho tarz-e-fughan apna

ki ho sayyad khud bhi rafta rafta ham-zaban apna

kiye ja kaam haan ai gardish-e-daur-e-zaman apna

hamen bhi dekhna hai kaise mitta hai nishan apna

adu hain bijliyan apni na dushman asman apna

hamen khud apne hathon phunkte hain ashiyan apna

na kho de sust-gami ham ko bazi-gah-e-hasti men

na gard-e-karvan rah jaae ban kar karvan apna

chaman ke patte patte par hain yarab bijliyan qabiz

kahan le jaaen murghan-e-chaman ab ashiyan apna

urus-e-manzil-e-maqsud mil hi jaegi ik din

yunhi chande raha garja vo paima karvan apna

jala den ham qafas ki titliyan shoala-navai se

har ik murgh-e-chaman ‘asi’ agar ho ham-zaban apna