asir-e-hafiza ho aaj ke jahan men aao
mukalme ke liye asr ki zaban men aao
pae sabat-e-taghayyur pukarte hue guzre
chhaten shikasta hain niklo nae makan men aao
zamin ka vaqt se jhagda hai khud nipatte rahenge
kaha hai kis ne ki tum un ke darmiyan men aao
ye aath pahr ki duniya tumhen bataun ki kya hai
nikal ke jism se kuchh der apni jaan men aao
tumhen tumhari alif diid men main dekhna chahun
nazar bacha ke zamane se mere dhyan men aao
Leave a Reply