Jigar Moradabadi
allah re is gulshan-e-ijad ka aalam
jo said ka aalam vahi sayyad ka aalam
uf rang-e-rukh-e-bani-e-bedad ka aalam
jaise kisi mazlum ki fariyad ka aalam
pahron se dhadakne ki bhi aati nahin avaz
kya janiye kya hai dil-e-nashad ka aalam
mansur to sar de ke subuk ho gaya lekin
jallad se puchhe koi jallad ka aalam
main aur tire hijr-e-musalsal ki shikayat
tera hi to aalam hai teri yaad ka aalam
kya janiye kya hai miri meraj-e-maqami
aalam to hai sirf ik miri uftad ka aalam
arbab-e-chaman se nahin puchho ye chaman se
kahte hain kise nikhat-e-barbad ka aalam
kyuun atish-e-gul mere nasheman ko jalae
tinkon men hai khud barq-e-chaman-zad ka aalam
Leave a Reply