Ahmad Faraz
ajab junun-e-masafat men ghar se nikla tha
khabar nahin hai ki suraj kidhar se nikla tha
ye kaun phir se unhin raston men chhod gaya
abhi abhi to azab-e-safar se nikla tha
ye tiir dil men magar be-sabab nahin utra
koi to harf lab-e-charagar se nikla tha
ye ab jo aag bana shahr shahr phaila hai
yahi dhuan mire divar-o-dar se nikla tha
main raat tuut ke roya to chain se soya
ki dil ka zahr miri chashm-e-tar se nikla tha
ye ab jo sar hain khamida kulah ki khatir
ye aib bhi to ham ahl-e-hunar se nikla tha
vo qais ab jise majnun pukarte hain ‘faraz’
tiri tarah koi divana ghar se nikla tha
Leave a Reply