Nazeer Akbarabadi
aish kar khuban men ai dil shadmani phir kahan
shadmani gar hui to zindagani phir kahan
jis qadar piina ho pi le paani un ke haath se
ab-e-jannat to bahut hoga ye paani phir kahan
lazzaten jannat ke meve ki bahut hongi vahan
phir ye mithi galiyan khuban ki khani phir kahan
vaan to haan huron ke gahne ke bahut honge nishan
in pari-zadon ke chhallon ki nishani phir kahan
ulfat-o-mahr-o-mohabbat sab hain jite-ji ke saath
mehrban hi uth gae ye mehrbani phir kahan
vaaiz o naseh baken to un ke kahne ko na maan
dam ghanimat hai miyan ye naujavani phir kahan
ja pade chup ho ke jab shahr-e-khamoshan men ‘nazir’
ye ghazal ye rekhta ye sher-khvani phir kahan
Leave a Reply