Ahmad Faraz
agarche zor havaon ne daal rakkha hai
magar charagh ne lau ko sambhal rakkha hai
mohabbaton men to milna hai ya ujad jaana
mizaj-e-ishq men kab e’tidal rakkha hai
hava men nashsha hi nashsha faza men rang hi rang
ye kis ne pairahan apna uchhal rakkha hai
bhale dinon ka bharosa hi kya rahen na rahen
so main ne rishta-e-gham ko bahal rakkha hai
ham aise sada-dilon ko vo dost ho ki khuda
sabhi ne vada-e-farda pe taal rakkha hai
hisab-e-lutf-e-harifan kiya hai jab to khula
ki doston ne ziyada khayal rakkha hai
bhari bahar men ik shakh par khila hai gulab
ki jaise tu ne hatheli pe gaal rakkha hai
‘faraz’ ishq ki duniya to khub-surat thi
ye kis ne fitna-e-hijr-o-visal rakkha hai
Leave a Reply