Saleem Kausar
abhi jo gardish-e-ayyam se mila huun main
samajh rahi thi kisi kaam se mila huun main
shikast-e-shab tiri taqrib se zara pahle
diye jalati hui shaam se mila huun main
ajal se pahle bhi milta raha huun par ab ke
bade sukun bade aram se mila huun main
tiri qaba ki mahak har taraf numayan thi
hava-e-vadi-e-gul-fam se mila huun main
main janta huun makinon ki khamushi ka sabab
makan se pahle dar-o-bam se mila huun main
‘salim’ naam bataya tha ghaliban us ne
kal ek shaer-e-gum-nam se mila huun main
Leave a Reply