Abhi Apne Martaba-E-Husn Se Miyan Ba-Khabar Tu Hua Nahin

Mushafi Ghulam Hamdani

abhi apne martaba-e-husn se miyan ba-khabar tu hua nahin

ki ghazal-sara tire baagh men koi murgh-e-taza-nava nahin

jo gali men yaar ki jaun huun to ajal kahe hai ye rahm kha

tu sitam-rasida na ja udhar koi zinda vaan se phira nahin

vo gharib-o-be-kas-o-zar tha tujhe us ka deta huun main pata

tire kushta ka vo mazar tha ki charagh jis men jala nahin

jo hakim paas main jaun huun to vo dosti se sunae hai

tu maash ki bhi talash kar ye maqam-e-faqr-o-fana nahin

mujhe ishq rakhta hai sar-nigun mira jaal puchho na kya kahun

main habab-e-bahr ka shisha huun mire tutne ki sada nahin

tire khaksaron ne apna sar nahin piita dasht men is qadar

ki bagula vaan se ghubar ka taraf asman ke gaya nahin

na nasim-e-bagh-o-bahar huun na fida-e-ru-e-nigar huun

main gharib-e-shahr-o-dayar huun miri dair o kaaba men ja nahin

tire nakhl-e-husn ki konplen abhi na-shagufta hain ai pari

jo nasim aai hai us ne bhi inhen kuchh samajh ke chhua nahin

tire gesuon men jo jaati hai to mira hi haal kah aati hai

miri khasm-e-jan bhi to is qadar ye nasim-e-nafa-kusha nahin

na main rahne vaala huun baagh ka na safir-sanj huun raag ka

mujhe dhunde hai so vo kis jagah kahin ashiyan-e-huma nahin

koi zakhm-khurda hai khaar ka koi khun-tapida bahar ka

hai mira hi hausla ‘mushafi’ ki kisi se mujh ko gila nahin