Shakeel Badayuni
ab to khushi ka gham hai na gham ki khushi mujhe
be-his bana chuki hai bahut zindagi mujhe
vo vaqt bhi khuda na dikhae kabhi mujhe
un ki nadamaton pe ho sharmindagi mujhe
rone pe apne un ko bhi afsurda dekh kar
yuun ban raha huun jaise ab aai hansi mujhe
yuun dijiye fareb-e-mohabbat ki umr bhar
main zindagi ko yaad karun zindagi mujhe
rakhna hai tishna-kam to saaqi bas ik nazar
sairab kar na de miri tishna-labi mujhe
paaya hai sab ne dil magar is dil ke bavajud
ik shai mili hai dil men khatakti hui mujhe
raazi hon ya khafa hon vo jo kuchh bhi hon ‘shakil’
har haal men qubul hai un ki khushi mujhe
Leave a Reply