Shakeel Badayuni
ab tak shikayaten hain dil-e-bad-nasib se
ik din kisi ko dekh liya tha qarib se
aksar ba-zom-e-tark-e-mohabbat khuda gavah
guzra chala gaya huun dayar-e-habib se
dast-e-khizan ne badh ke vahin us ko chun liya
jo phuul gir gaya nigah-e-andalib se
ahl-e-sukun se khel na ai mauj-e-imbisat
ik din ulajh ke dekh kisi gham-nasib se
na ahl-e-naz ko bhi mile fursat-e-niyaz
main duur hat gaya jo vo guzre qarib se
ye kis khata pe ruuth gai chashm-e-iltifat
ye kab ka intiqam liya mujh gharib se
un ke baghair bhi hai vahi zindagi ka daur
halat-e-zindagi hain magar kuchh ajiib se
samjhe hue the husn-e-azal jis ko ham ‘shakil’
apna hi aks-e-rukh nazar aaya qarib se
Leave a Reply