Aarzu Hai Main Rakhun Tere Qadam Par Gar Jabin

Poet

aarzu hai main rakhun tere qadam par gar jabin

tu uthave naaz se zalim laga thokar jabin

apne ghar men to bahut patka pa kuchh hasil nahin

ab ke ji men hai tiri chaukhat pe rouun dhar jabin

jaisi peshani tiri hai ai mire khurshid-ru

chand ki hai raushni men us se kab behtar jabin

shaikh aa jalva khuda ka mai-kade men hai mire

kyuun ragadta hai abas kaabe ke tu dar par jabin

kya karun tere qadam tak to nahin hai dastaras

naqsh-e-pa hi par tire malta huun main akasr jabin

shaikh gar shaitan se surat nahin milti tiri

bas bata daghi hui hai kis tarah yaksar jabin

hai kisi ki bhi tiri se aundhi peshani bhala

dekh tu ai shokh apni aaina le kar jabin

aa ke jin hathon se malta tha tire talvon ke taiin

pitta huun ab unhin hathon se main akasr jabin

buujh kar naqsh-e-qadam ko tere mehrab-e-dua

mangta huun main murad-e-dil ko rakh is par jabin

chand ka mukhda hai ya aina ya mushaf ka lauh

ya tiri hai ai mire rashk-e-mah-o-akhtar jabin

saaf dil ‘taban’ mukaddar hi kabhu hota nahin

aina ki haigi raushan dekh le yaksar jabin