Faiz Ahmad Faiz
”aap ki yaad aati rahi raat bhar”
chandni dil dukhati rahi raat bhar
gaah jalti hui gaah bujhti hui
sham-e-gham jhilmilati rahi raat bhar
koi khushbu badalti rahi pairahan
koi tasvir gaati rahi raat bhar
phir saba saya-e-shakh-e-gul ke tale
koi qissa sunati rahi raat bhar
jo na aaya use koi zanjir-e-dar
har sada par bulati rahi raat bhar
ek ummid se dil bahalta raha
ik tamanna satati rahi raat bhar
Leave a Reply