Obaidullah Aleem
aao tum hi karo masihai
ab bahalti nahin hai tanhai
tum gae the to saath le jaate
ab ye kis kaam ki hai binai
ham ki the lazzat-e-hayat men gum
jaan se ik mauj-e-tishnagi aai
ham-safar khush na ho mohabbat se
jaane ham kis ke hon tamannai
koi divana kahta jaata tha
zindagi ye nahin mire bhaai
avval-e-ishq men khabar bhi na thi
izzaten bakhshti hai rusvai
kaise paao mujhe jo tum dekho
sath-e-sahil se meri gahrai
jin men ham khel kar javan hue
vahi galiyan huiin tamashai
Leave a Reply