Poet
aalam men hare honge ashjar jo main roya
gulchin nahin sinchenge gulzar jo main roya
barsega jo abr aa kar khul jaega dam bhar men
aansu nahin thamne ke ai yaar jo main roya
roo.ge jharoke men tum hichkiyan le le kar
ai yaar kabhi zer-e-divar jo main roya
zakhmi huun to hone do kyuun yaar bisorun main
kya baat rahi kha kar talvar jo main roya
huun mustaid-e-riqqat farhad mujhe bahla
le dubenge tujh ko bhi kohsar jo main roya
majnun ne kaha jaao vahshat unhen dikhlao
baitha hua sahra men be-kar jo main roya
rahm aa hi gaya un ko katva de miri bedi
zindan men chilla kar ik baar jo main roya
ki ghusse ke maare phir us ne na nigah sidhi
in ankhdiyon ka ho kar bimar jo main roya
betabi o zaari par meri unhen rahm aaya
dikhla hi diya mujh ko didar jo main roya
aram vo karte hain rulva na mujhe ai dil
thahrenge na vo ho kar bedar jo main roya
aae the ba-mushkil vo laae the ‘sharaf’ un ko
phir uth gae vo ho kar bedar jo main roya
Leave a Reply