Fahmida Riaz
ye to barzakh hai yahan vaqt ki ijad kahan
ik baras tha ki mahina hamen ab yaad kahan
vahi tapta hua gardun vahi angara zamin
ja-ba-ja tishna o ashufta vahi khak-nashin
shab-garan zist-garan-tar hi to kar jaati thi
sud-khoron ki tarah dar pe sahar aati thi
ziist karne ki mashaqqat hi hamen kya kam thi
mustazad us pe pirohit ka junun-e-taza
sab ko mil jaae gunahon ka yahin khamyaza
na-rava-dar fazaon ki jhulasti hui luu!
mohtasib kitne nikal aae gharon se har su
tadte hain kisi chehre pe taravat to nahin
koi lab nam to nahin bashre pe farhat to nahin
kucha kucha men nikale hue khuni diide
gurz uthae hue dhamkate phira karte hain
nau-e-adam se bahar-taur riya ke talib
ruuh be-zar hai kyuun chhod na jaae qalib
zindagi apni isi taur jo guzri ‘ghalib’
ham bhi kya yaad karenge ki khuda rakhte the
Leave a Reply