Aag Ki Kahaniyan

Tanveer Anjum

haan ye sach hai

ki tum ne mujhe

aur use

aur phir use

aur akhir men use

bacha liya

main ik aag men thi

aur mere baad vo bhi

aur phir vo bhi

aur akhir men vo bhi

sirf tum bahar thiin

tum ne sab ko dekha

ek ek kar ke

tum ne hamen bacha liya

phir ham ne apni apni aag ki kahaniyan sunain

aur tum ne sunin

ham ne muqabla kiya

apni apni aag ke taqaddus ka

aur shiddat ka

aur tum se chaha

munsifana faisla

tum ne alag alag sab ka khayal rakha

aur main laut gai

apne adh-jale baagh ki taraf

aur mere baad vo bhi

aur phir vo bhi

aur akhir men vo bhi

aur koi nahin tha

jab ik aag ne

tumhen jala diya